أصل الموضوع:
بعد ما نظام الاتفاقيات الثنائية “قطاع خاص مع قطاع خاص” اتوافق عليه الشهر اللي فات، حوالي 20 شركة من القطاع الخاص – من ضمنهم شركة “السويدي اليكتريك” المدرجة في البورصة – بتخطط لاستثمارات ضخمة. الخطة هي تزويد الكهرباء من خلال مشاريع الطاقة المتجددة لشركات خاصة أخرى، ومن المتوقع الاستثمارات تتجاوز المليار دولار، حسب مصادر لـ”العربية Business”.
معلومة كلابس – نظام الاتفاقيات الثنائية:
نظام الاتفاقيات الثنائية “قطاع خاص مع قطاع خاص” الجديد بيسمح للشركات الخاصة بإنتاج وبيع الطاقة المتجددة مباشرةً لبعضها البعض عبر الشبكة القومية. فكر فيه أكنه “إير بي إن بي” للكهرباء—الشركات بتنتج الطاقة (غالبًا من مصادر متجددة زي الشمس والرياح)، وتبيعها مباشرةً لشركات أخرى. والدور الوحيد للحكومة؟ بتحصل على رسوم صغيرة مقابل استخدام الشبكة.
مين داخل؟
شركات طاقة محلية زي إنفينيتي وكرم سولار، جنب إنارة والسويدي اليكتريك المدرجة في البورصة. كمان الفكرة جذبت اهتمام لاعبين عالميين زي إيميا باور من الإمارات، وسكاتك من النرويج، والعملاق الفرنسي الحكومي للطاقة إي دي إف.
التيارات بتتحرك:
مسؤولين من الشركات المهتمة قالوا لـ”العربية Business” إن الشركات اتفقت مبدئيًا من أكتر من 10 شهور مع مصانع الأسمدة والسيراميك والأسمنت لتزويدهم بالكهرباء اللازمة من مشروعات الطاقة المتجددة، وكانوا في انتظار القواعد التنظيمية لاستكمال الإجراءات التعاقدية.
ليه ده مهم:
الخطوة دي مهمة جدًا لتحقيق هدف مصر نحو سوق كهرباء مفتوح بحلول 2025، حسب كلام مصدر لـ”انتربرايز”. وحسب نفس المصدر، السوق المفتوح لبيع الكهرباء هيسرع من ظهور مشاريع الطاقة المتجددة ويجذب استثمارات بمليارات الدولارات للقطاع.
