اشترك في كلابس مصر

المستوردين هياخدوا دولارات

حنفية الدولارات بتفتح

خبر بفلوس:

البنوك هتبدأ تدي خطابات اعتماد لمستوردي السلع الاساسية والغير اساسية من أول يونيو، حسب مصدر لإنتربرايز”

معلومة كلابس – خطاب اعتماد:

هي اتفاقية لتسهيل الاستيراد والتصدير بيضمن بيها البنك دفع ثمن البضاعة المستوردة بعد وصولها.

أصل الموضوع:

مع أزمة عدم توفر الدولار، الحكومة حطت قيود على توفير العملة الصعبة المطلوبة لتخليص البضاعة المستوردة من الموانئ. في قمة الأزمة، حصل تأثر في توفير السلع الاساسية زي الادويه والاكل. مع توفر الدولار، القيود دية بدأت تتشال وقربنا نوصل لمرحلة إن مستوردين كل السلع يتوفرلهم التمويل المطلوب.

طب ليه دلوقت؟

من المحتمل أن ده تأثير كذا حدث، زي دخول مليار دولار من بيع أذون خزانة من يومين، فتح شريحة جديدة من التمويل بعد إتمام صندوق النقد الدولي مراجعته الثانية، وتخصيص البنك المركزي مبلغ 6 مليار دولار للقطاع البنكي من صفقة رأس الحكمة.

برضه البنك المركزي كان عنده وقت يبص علي تأثير رفع نسبة الفائدة وآثار صفقة رأس الحكمة وتعويم الجنيه على الاقتصاد.

ليه ده مهم:

زيادة تدفق العملة الأجنبية بيساعد على رجوع ثقة الشركات في الاقتصاد وفي منع رجوع السوق السوداء وبيزود كفاءة السوق في تحديد سعر العملة مع زيادة سهولة الحصول عليها.