الخبر:

البنك المركزي المصري (CBE) هيسيب أسعار الفايدة ثابتة في اجتماعه الجاي بكرة في محاولة لامتصاص الزيادات المتوقعة في أسعار الوقود والكهربا، 11 بنك استثماري اجمعوا في استطلاع أجرته إقتصاد الشرق.

إيه سبب  رفع أسعار الفايدة بشكل عام؟

رفع أسعار الفايدة بيؤدي لعوائد أعلى على المدخرات، وكمان بيزود تكلفة الحصول على قروض.

المستهلكين رد فعلهم  لأسعار فايدة أعلى بيبقى تجنب المشتريات الكبيرة وتقليل الصرف بسبب زيادة تكلفة الاقتراض. تقليل الطلب الاستهلاكي ممكن يساعد في خفض الأسعار و تنزيل معدلات التضخم.

افتكر:

 في اجتماعه يوم 6 مارس، المركزي رفع أسعار الإيداع الليلي والإقراض لليلة واحدة  والسعر الأساسي بمقدار 600 نقطة أساس لـ27.25%، 28.25%، و27.75% على التوالي. 

مفيش تخفيض متوقع قريب:

“إحنا شايفين إن البنك المركزي مش هيخفض الفايدة في اجتماعه الجاي،” كبير استراتيجيات الأسهم في رامبل، عمرو الألفي قال لنا، ووضح كذا سبب:

#1 معدل التضخم السنوي كان بيتباطأ في الأربع شهور اللي فاتوا لكن المعدل الشهري ارتفع تاني في يونيو، وده بيدل على وجود ضغوط تضخمية. ده بالإضافة للزيادات المتوقعة في أسعار الكهرباء والوقود في الشهور اللي جاية.

#2 أسعار الفايدة الحقيقية المبنية على معدلات التضخم التاريخية لسه سلبية.

#3 اتفاق صندوق النقد الدولي مع مصر كان على الحفاظ على بيئة انكماشية لحد ما يبقى مسار خفض التضخم أكثر استدامة.

توقعات للمستقبل:

“التوقع الأساسي بتاعنا لسه إن البنك المركزي هيبدأ دورة التيسير في 2025، ونتوقع إنه هيعمل كده بشكل تدريجي. بعد ما رفع أسعار الفايدة بنسبة 19% على مدار 2022-2024، نتوقع إن دورة التيسير هتوصل لإجمالي 18% على مدار فترة 4 سنين (2025-2028)،” الألفي قال لنا.