خبر بفلوس
وكالة موديز قالت إن عملية بيع الأصول الحكومية، اللي تعتبر من النقاط الأساسية في برنامج مصر مع صندوق النقد الدولي، بتتم بشكل أبطأ من المتوقع، ودة بيخلي الضغط على قيمة الجنيه لسة مستمر.
أصل الموضوع
الوكالة أضافت إن بطء البيع بجانب الانخفاض في السيولة الأجنبية اللي حصل خلال يناير وفبراير 2023، بيخلي في مخاطرة على قدرة مصر في تحمل ديونها بطريقة مستدامة.
ليه دة مهم
الوكالة قالت إن مع ارتفاع العائد المطلوب على الديون المصرية في السوق، هيخلي مصر تلاقي صعوبة في استمرار اعتمادها على أسواق المال كمصادر للتمويل.
الوكالة أشارت لإن العقود الآجلة للجنيه المصري اللي بقت تسعر الدولار دلوقتي بأكتر من 40 جنيه للدولار، بتشير لانخفاض متوقع في قيمة الجنيه بنسبة 20%.
ودلوقتي؟
موديز توقعت إن نسبة الديون المصرية من الناتج المحلي الإجمالي عن السنة المالية 2023 توصل لـ 91.3%، ودة مؤشر خطير على استدامة الدين.
