خبر بفلوس
لسة أخبار الطروحات مستمرة، والمرة دي الكلام عن شركات النصر للزجاج، بورسعيد لتداول الحاويات و كيما، وهنا هنوضح تفاصيل أكتر عن الشركات الـ 3 دول
أصل الموضوع
النصر للزجاج: وزير قطاع الأعمال العام، محمود عصمت قال إن الشركة السعودية المصرية للاستثمارات الصناعية، ذراع صندوق الاستثمارات العامة، قربت من الاستحواذ على 70% منها، من خلال زيادة راس المال، وحاليًا بيتم مناقشة خطط تطوير الشركة زي إضافة خطوط إنتاج جديدة.
بورسعيد لتداول الحاويات: مجلس إدارة هيئة قناة السويس، اللي بيمتلك 39% من الشركة، وافق على طرح 20% من الشركة في البورصة.
كيما: بحسب مصادر للبورصة، فيه شركة تابعة لشركة أبو ظبي القابضة مهتمة إنها تشتري من 20% لـ 25% من شركة كيما.
ليه دة مهم
النصر للزجاج تعتبر من الشركات المصدرة، لإن الشركة بتصدر منتجاتها لـ 32 دولة، أما بورسعيد لتداول الحاويات فكانت عيون جهاز قطر للاستثمار عليها من خلال شركته التابعة مها كابيتال.
أما شركة كيما، فالمصادر قالت إن خيار بيع حصة منها هو واحد من الحلول التمويلية المقترحة، لتوفير التمويل المطلوب لمشروع “كيما 2″، اللي متوقع ان الاستثمارات فيه توصل لـ 297 مليون دولار.
دلوقتي؟
المصادر قالت إن طرح النصر للزجاج وبورسعيد لتداول الحاويات هيكون خلال الأسابيع القليلة اللي جاية، أما كيما فقالت إن لسة موصلهاش أي عرض رسمي لغاية دلوقتي.
