خبر بفلوس
بعد أزمة الأعلاف اللي موجودة في سوق الدواجن، مجلس الوزراء قرر ضم مزارع إنتاج الدواجن للإعفاءات المقررة على سداد الضريبة العقارية لمدة 3 سنوات.
أصل الموضوع
القرار تضمن إن الإعفاء عن الضريبة العقارية لمزارع الدواجن هيتم بأثر رجعي من بداية تطبيق قرار الإعفاء على عدد من القطاعات، دة معناه إن بداية الإعفاء هتكون من 1 يناير 2022 لـ 31 ديسمبر 2024.
ليه دة مهم
الآراء اختلفت إذا كان القرار دة هيساعد في حل أزمة أسعار الدواجن ولا لأ، في عاملين بقطاع الدواجن قالوا إن الإعفاءات الضريبية دي هتساعد في تخفيف الأسعار، ولكن ناس تاني في القطاع قالوا إن ارتفاع أو انخفاض الأسعار بيكون بسبب عوامل تانية غير الإعفاءات الضريبية.
ودلوقتي؟
من المتوقع إن قيمة الإعفاءات الضريبية العقارية للمزارع، واللي هتتحملها وزارة المالية، هتكون 16.5 مليون جنيه عن إجمالي الـ 3 سنين.
