Subscribe to Egypt Claps
إمدادات الغاز قلت تاني مع موجة الحر وده خلا شركة أبو قير للأسمدة تقفل التلت مصانع بتوعها للمرة التانية في نفس الشهر . مع وقوع الغاز الحكومة رجعت تاني قرار قفل المحلات التجارية يومياً من الساعة 10 بالليل. رئيس الوزراء – اللي قال إن نقص الغاز جاي بسبب توقف عمليات في “دولة مجاورة” لمدة 12 ساعة – وضح إن قطع التيار الكهربائي بعد اجازة العيد المفروض ينتهي في الأسبوع التالت من يوليو بالكتير. مدبولي قال برضو إن مصر هتصرف مليار دولار عشان تستورد وقود لمحطات الطاقة في الفترة الجاية.
غير كدة عدد النهارده فيه تحديثات على استراتيجية توسع بأكثر من مليار جنيه من عبور لاند، توقعات جديدة عن شكل السنة للبنوك من فيتش، و أكتر.
بس الأول… شركة “فرايدي آيس كريم” أعلنت خطة للاكتتاب عل البورصة على أخر 2026 . الطرح العام جاي بعد ما الشركة خلصت التلت مراحل بتوع بناء مصنعها الجديد.
مصانع أبو قير قفلت تاني بسبب نقص إمدادات الغاز
الخبر:
للمرة التانية في نفس شهر، شركة أبو قير للأسمدة اضطرت توقف الإنتاج وتقفل أبواب مصانعها التلاتة بسبب تقليل إمدادات الغاز اللي بتوفرها الحكومة.
إفتكرو:
في أول يونيو ، وزارة البترول قللت إمدادات الغاز الطبيعي لشركات تصنيع الأسمدة بنسبة 20-30%. شوية شركات زي الصناعات الكيماوية المصرية، مصر لإنتاج الأسمدة “موبكو”، أليكس فرت، قفلوا مصانعهم بسبب النقص.
ايه حل المشكلة؟
الشركة المصرية القابضة للغازات الطبيعية ناوية تطرح مناقصة دولية عشان تأمن عل أقل 17 شحنة غاز مسال خلال التلات شهور الجاية عشان تلبي الطلب المحلي. استراتيجية الاستيراد – المتوقع تتكلف حوالي 120 مليون دولار في الشهر لكل تلت شحنات – جاية بعد تنفيذ قطع كهربا يومي عشان نوفر حوالي 300 مليون دولار في الشهر.
عبور لاند عايزة تبني مصنع جديد للجبنة المصنعة و بتخطط مزرعة ماوشي جديدة بـ 800 مليون جنيه
الخبر:
شركة عبور لاند للصناعات الغذائية (OLFI) بتخطط تبني مصنع جديد للجبن المصنع بتكلفة 350 مليون جنيه السنادي، وكمان عايزة تبني مزرعة مواشي جديدة ب800 مليون جنيه كجزء من استراتيجية توسع استثماري جديدة عشان تزود انتاجها و صادراتها.
المزرعة:
OLFI وضحت في إفصاح للبورصة إنها بتعمل خطة عشان تحقق مشروع إنشاء مزرعة مواشي على مساحة 44 فدان تستوعب عل أقل 2000 ماشية حلوب.
خطة للتصدير:
الشركة قالت إن الخطة جزء من هدفها لتوسيع إيرادات التصدير السنادي لـ 40 مليون دولار.
،الشركة عملت شغل حلو اوى فى اول تلت شهور من 2024:
OLFI جابت 157 مليون جنيه صافي دخل في التلت شهور اللي خلصت في مارس بزيادة 36.34% على أساس سنوي. الشركة برضو زودت إيراداتها بنسبة 18.36% على أساس سنوي ل 1.74 مليار جنيه في الربع الأول من 2024.
الخبر:
شركة الأبحاث والتحليل العملاقة فيتش سوليوشنز متوقعة سنة أقوى في 2024 لقطاع البنوك المحلي بسبب زيادة التدفقات من العملات الأجنبية واستقرار أسعار الصرف بعد التعويم في مارس. الشركة كمان متوقعة إن معدلات التضخم هتوصل لحوالي 25% السنادي.
توقع إن يبقى في تحسن في وضع عجز الأصول الأجنبية:
تحويلات المغتربين اللي زادت بنسبة 43.8% على أساس سنوي في أبريل ووصلت لـ 2.2 مليار دولار، واستثمارات المحافظ اللي في الفترة المؤخرة بتزيد بشكل مستمر حسنت وضع الأصول الأجنبي بتاعتنا. فيتش بتنسب التقدم ده لتسهيل تحويل الفلوس ولعوائد أعلى على أدوات الدين المصرية. ده أدى لتقليل العجز في الأصول الأجنبية بنسبة 87% بعد ما وصل لأعلى مستوى ليه (29 مليار دولار) في يناير.
البنوك هتستغل التدفقات الجديدة ازاي؟
البنوك هتستخدم الزيادة في التدفقات عشان تعزز إقراض العملات الأجنبية للشركات، و لتسوية متأخرات الدفع لشركات البترول، دعم الواردات غير الأساسية وتخفيف تراكمات الواردات.
توقعات تانية:
فيتش شايفة إن البنك المركزي المصري مش هيرفع أسعار الفايدة لحد أخر 2024. ومن ناحية تانية، الشركة بتقول تعويم الجنيه المصري هيأثر بسيط على الميزانيات العمومية للبنوك المصرية وموقفها المالي عشان القطاع يقدر يستحمل زيادة بنسبة 35% في قيمة الدولار مقابل الجنيه المصري.
في أخبار اقتصادية تانية:
البنك الدولي قلل التمويل المخصص لمشروع تنفيذ سياسة الملكية العامة للدولة لـ 500 مليون دولار بدل من الحزمة اللي كانت متوقع تكون بحوالي مليار دولار، ومتوقع إنه يوافق على الحزمة في 30 سبتمبر.
الخبر:
الرئيس عوافق على قانون هيسمح لشركات القطاع الخاص بإنشاء، إدارة، وتشغيل المنشآت الصحية والمستشفيات العامة لمدة بين 3-15 سنة. لما تنتهي الفترة، المنشآت دي هترجع تاني لملكية الدولة. القواعد الإدارية للقانون هتتنشر بعد شهر.
القانون مش هينتبق على مين ؟
القانون مش هيشمل المنشآت الطبية اللي بتقدم خدمات أساسية للأمن القومي، الرعاية الصحية الأساسية، وحدات تنظيم الأسرة، وكمان مراكز جمع الدم والبلازما.
أخبار تانية:
نفت المصرية للاتصالات أخبار انها وصلت لقرار عن تفكرها لاستحواذ كامل على شركة التوقيع الإلكتروني وأمن المعلومات إيجيبت تراست، وقالت إن الخطة لسة تحت الدراسة.
.بعد ما تكمل عملية إعادة هيكلة ديونها، الشريك الرئيسي لشركة القلعة ( سيتادل كابيتال بارتنرز)، مش هتزود حصتها فالشركة المديونة عن 33%. حاليًا سيتادل بتمتلك 23.49% من أسهم الشركة.
وافق مجلس إدارة راية القابضة على قرار لتخفيض راس المال المصدر والمدفوع للشركة بمقدار 1.673 مليون جنيه ل1.07 مليار جنيه.
شركة سوديك هتفتتح مشروعها التجاري EDNC – اللي هيتعمل على مساحة 14.7 ألف متر مربع في القاهرة الجديدة – على سبتمبر 2024.
ابتداءً من امبارح، البنك التجاري الدولي (CIB) نزل رسوم المعاملات بالعملات الأجنبية بالنص ل5%، وزود الحد للمعاملات المحلية الشهرية بالعملات الأجنبية اlبين 75-100 ألف جنيه حسب نوع الحساب. الحد الأقصى لعمليات الشرا برى مصر الخارج كل شهر دلوقتي هتتراوح بين 100-300 ألف جنيه.
Latest CLAPS
