شركة طاقة عربية مستعدة إنها تكون تاني شركة في قطاع المرافق يتم قيدها في البورصة المصرية. ولكن الشركة مش مجرد شركة للمرافق بس، والإدراج كمان مش هيكون خلال الطرح العام الأولي، دة لإن شركة طاقة عربية، اللي تعتبر واحدة من الشركات التابعة للشركة المقيدة في الأساس “القلعة للاستثمارات المالية”، هيتم طرحها للتداول من خلال الإدراج المباشر. فالشركة دي بتعمل إيه، وإزاي بتكسب أرباحها؟ وياترى أصلًا إيه هو الإدراج المباشر؟ كل دي أسئلة هنعرف إجاباتها وأكتر في المقالة دي.

ولكن الأول، في حاجات مهمة لازم تعرفها قبل ما السهم يبدأ تداوله يوم الأحد 9 يوليو، 2023

اللي لازم تعرفه قبل يوم الأحد

سعر الفتح الاسترشادي لطاقة عربية يوم الأحد 9 يوليو، 2023 هيكون 0.5 جنيه لكل سهم، ولكن بالرغم من دة، سعر أول عملية تداول هيتم تحديده بناءً على العرض والطلب قبل بداية الجلسة. دة معناه ان المستثمرين ممكن يحطوا أوامر شراء بالسعر اللي شايفينه عادل لسهم شركة طاقة عربية، أو بمعنى تاني، أول عملية تداول هيتم تنفيذها على أعلى سعر شراء، ومن المستحسن عدم وضع أمر شراء بسعر السوق مع بداية جلسة التداول
خلال اليوم الأول للتداول، سهم طاقة عربية مش هيكون مقيد بالحدود السعرية للأسهم، وبكدة السهم ودة معناه إن السهم ممكن يرتفع أو يقل لأي مستوى حسب العرض والطلب، والتغير في السعر مش هيكون محدد بـ 20% بس، ودة اللي هيتطبق من تاني يوم للتداول
شركة طاقة عربية مش موجودة على قايمة البيع والشراء في نفس اليوم الخاصة بمصر للمقاصة، ودة معناه انك لو اشتريت السهم، مش هتقدر تبيعه في نفس اليوم.
عند وضع أمر بالشراء، اضرب السعر اللي انت عايز تشتري بيه في إجمالي الأسهم القائمة لشركة طاقة عربية (1.3 مليار سهم) علشان توصل للقيمة السوقية التقديرية للشركة. فعلى سبيل المثال، لو انت طلبت شراء أسهم بسعر 2.5 جنيه لكل سهم، فتقديرك للقيمة السوقية لشركة طاقة عربية هيكون 3.45 مليار جنيه .
الشركة الوحيدة الأخرى في قطاع المرافق في البورصة المصرية هي شركة غاز مصر، لو اخترت الشركة دي تكون مرجع للتقييم بتاعك، فهتلاقي هنا معلومات مهمة:
- القيمة السوقية لشركة “غاز مصر” بحلول يوم 6 يوليو 2023: 3 مليار جنيه
- صافي أرباح “غاز مصر” في 2022: 302 مليون جنيه
- القيمة السوقية مقسومة على الأرباح “مضاعف الربحية”: 10 مرة (دة معناه إن المستثمرين بيدفعوا 10 جنيه مقابل كل جنيه بتحققه الشركة”
- صافي أرباح طاقة عربية: 539 مليون جنيه

الطرح

تاريخياً
من 2019 وطاقة عربية عينيها على البورصة المصرية، لما رئيس الشركة المالكة لها “القلعة للاستثمارات المالية”، صرح إنه في خطط لطرح طاقة عربية في البورصة في الربع الثاني من 2020، ولكن الخطة اتعطلت بسبب جائحة كوفيد-19. ولكن في نوفمبر 2022 ومع قمة المناخ “كوب 27″، رئيس القلعة صرح تاني بإن طاقة عربية مستعدة إنها تكون في البورصة في وقتًا ما في 2023.

الإدراج في البورصة
بس هل ممكن شركة تابعة لشركة مدرجة أصلًا في البورصة يتم إتاحتها للتداول بشكل منفصل؟ آه ينفع، ودي عملية اسمها انبثاق الشركة. بصفة عامة، الغرض من انبثاق الشركة التابعة هو ان يكون فيه كيانات مستقلة علشان يكون فيه تركيز أكبر على أهداف العمل، يكون ليهم هويتهم الخاصة، يجذبوا استثمارات، وكمان يستغلوا الفرص الاستثمارية بشكل مستقل.

لو بصينا على استثمارات شركة القلعة للاستثمارات المالية، هنلاقيها بتتنوع ما بين الطاقة، الأسمنت، الطباعة والتغليف، التعدين، اللوجستيات والمواصلات. وعلشان كدة “الانبثاق” ممكن يكون اختيار كويس بالنسبة لطاقة عربية، وخاصةً إنها واحدة من الشركات القليلة الرابحة للقلعة.

وعلى الرغم من كدة، لقينا في إفصاح طاقة عربية إن فيه عملية إعادة هيكلة للمساهمين بتحصل. دة ممكن يكون معناه إن بعض المساهمين في شركة طاقة عربية ممكن يستخدموا الإدراج في البورصة علشان يتخارجوا من طاقة عربية. إعادة هيكلة المساهمين هتوفر مرونة أكبر للمستثمرين دول علشان يقدروا يتخارجوا من استثمارهم.

دة بالإضافة إنه بحسب الإفصاح، فإدراج الشركة في البورصة هيمكن شركة القلعة من نقل أسهم ملكية لأحد دائني الشركة. وبحسب الاتفاقية دي، القلعة هتقوم بنقل 20% من أسهم طاقة اللي بيمتلكوها لأحد دائني الشركة لم يتم ذكر اسمه، بالإضافة إلى 17.6% متوقعة للبنوك المصرية.

عن الشركة

طاقة عربية هي شركة توزيع طاقة، وتمتلك في محفظتها شركات تابعة في عدد من القطاعات قطاع الغاز وقطاع الكهرباء وقطاع توزيع المنتجات البترولية وقطاع المياه. من المهم كمان معرفة إن بعض الشركات التابعة دي، بتمتلك شركات تابعة تانية، ولكن هنتكلم عن دة بعدين.

الإدارة
فيه أسماء قوية متولية قيادة طاقة عربية. رئيس مجلس إدارة الشركة خالد أبو بكر، بيمتلك 37 سنة خبرة في مجال الغاز، وهو كمان بيشغل منصب رئيس الجمعية المصرية للغاز، واللي بتمتلك حصص تنفيذية في شركات طاقة مملوكة للدولة، وكمان عضو مجالس إدارة في عدد من الشركات الصناعية المقيدة في البورصة.

الرئيس التنفيذي لشركة طاقة عربية هي باكينام كفافي، وهي تمتلك 26 سنة من الخبرة في قطاعات الطاقة وبنوك الاستثمار. “كفافي” قامت بقيادة استراتيجية الشركة الخاصة بتنويع الأعمال في مجالات زي توليد الطاقة، التوزيع وأخيرًا الطاقة المتجددة. قبل ما تلتحق بطاقة عربية، شغلت “كفافي” منصب نائب رئيس بنك الاستثمار لـ “إي إف جي القابضة”.

طاقة بترول

خلينا نبدأ بشركة طاقة بترول، المالكة لمحطات الوقود “طاقة” اللي غالبًا كلنا سمعنا عنها. الشركة بتقوم بتوزيع الوقود من معامل التكرير لمحطات الوقود التابعة ليها، واللي بتوصل لـ 64 محطة (بحلول نهاية 2022).

خلال 2022، طاقة بترول باعت أكتر من 759 مليون لتر من بنزين 80/92/95 والسولار. ومع تزايد أعداد محطات الوقود لدى الشركة، الشركة استحوذت على وحدتين لتخزين الوقود، واحدة في السويس (شغالة حاليًا)، والتانية في اسكندرية (تحت التنفيذ).

شركة طاقة المتخصصة في قطاع البترول مش بس بتوزع الوقود، ولكنها بتنتج وبتوزع زيت العربيات “كاسترول”، ودة من خلال 80 منفذ بيع لـ “كاسترول” في أنحاء الجمهورية (بحلول نهاية 2022).

وبالرغم من إن طاقة بترول بتشكل النسبة الأكبر من إيرادات طاقة عربية (56% من الإيرادات) إلا إن هامش أرباحها أقل من طاقة غاز وطاقة باور، وعلشان كدة فبالرغم من مساهمتها الكبيرة في الإيرادات، إلا إنها بتساهم بـ 16% بس من الأرباح قبل الفوائد، الضرائب والإهلاك.

طاقة غاز

الشركة بتغطي سلسلة القيمة للغاز، بمعنى إنها بتبدأ من بالغاز الطبيعي المستخرج، وبتقوم لتحويله للوقود والمتتجات اللي بنستخدمها في حياتنا اليومية، وبعدين بتقوم بتوزيعه.

في 2022، طاقة غاز وصل لـ 1.5 مليون مستهلك منزلي و 365 عميل صناعي، والشركة بتسعى إنها تجذب 150 ألف عميل سنويًا. خدمات الغاز اللي بتقدمها الشركة بتغطي 8 محافظات في مصر و49 مدينة مصرية في السويس، البحر الأحمر، دمياط، كفر الشيخ، والصعيد من بني سويف حتى أسيوط.

من حقل الغاز الطبيعي لغاية المستهلك المنزلي أو العملاء من الشركات الصناعية، هنلاقي إن كل المواسير وشبكات التوصيل المطلوبة بتقدمها شركة طاقة غاز. ولكن خدمات طاقة غاز مش بس بتقف هنا، الشركة كمان بتقوم بتوزيع الغاز الطبيعي المضغوط والغاز الطبيعي المسال.

الغاز الطبيعي المضغوط هو نوع من الوقود بيستخدم للمركبات الأقل تلوثًا للبيئة، ولكن النوع دة مش مشهور علشان مفيش عربيات كتير موجودة مخصصة ليه، العربيات دي بتكون أغلى من غيرها اللي بتعمل بالبنزين أو السولار، وكمان قدرتها على التنقل بتكون أقل.

الغاز الطبيعي المسال، هو الشكل المسال للغاز الطبيعي بعد تبريده علشان يكون مناسب أكتر للتخزين والشحن، ويمكن تحويله مرة تانية لغاز لو لزم الأمر. الغاز الطبيعي المسال بيكون اختيار جيد كوقود مناسب للبيئة في عدد من المجالات زي التدفئة، توليد الكهرباء، والنقل.

وبالرغم من إن طاقة غاز بتشكل تقريبًا ربع إيرادات طاقة عربية، إلا إن هامش الأرباح قبل الفوائد، الضرائب والإهلاك بيوصل لـ 22%، وهو الأعلى بين الـ 4 شركات المملوكة لطاقة عربية، فتقريبًا بتساهم بنص (49%) الأرباح قبل الفوائد، الضرائب والإهلاك للشركة.

طاقة باور

ثالث أكبر شركة تابعة لطاقة عربية من حيث المساهمة في الإيرادات هي شركة طاقة باور. الشركة بتنتج وبتوزع الكهرباء المولدة بشكل تقليدي والمتجددة كمان. الشركة بتطور، تستثمر، تنشئ وتشغل محطات توليد الكهرباء وشبكات التوزيع للقطاعات السياحية، الصناعية،الزراعية التجارية والسكنية.

من المشروعات الشهيرة اللي طاقة باور اشتغلت فيها هي مول كايرو فيستيفال، مول العرب، وكومباوند سوان ليك. دة بالإضافة لمشروعات صناعية لشركات السويدي اليكتريك، إيديتا، كوكاكولا. ومطورين سياحيين زي ترافكو وفندق كيمبينسكي. أما في القطاع الزراعي، فالشركة نفذت أعمال لصالح مزارع دينا.

شركة طاقة باور بتمتلك 3 شركات تابعة متخصصة في مجال الطاقة المتجددة وهم: 1) طاقة للطاقة الشمسية 2) طاقة فولت 3) طاقة للألواح الضوئية

تم تأسيس طاقة للطاقة الشمسية لإنشاء محطة للطاقة الشمسية في بنبان بأسوان واللي بيعد من أهم المشروعات العالمية في مجال الطاقة المتجددة. المشروع دة يعتبر من المشروعات القومية الكبيرة، واللي الدولة بتحاول من خلالها جذب استثمارات وتسريع معدل مشروعات الطاقة المتجددة.

تم تأسيس طاقة فولت في 2022، كشركة متخصصة في تقديم خدمات شحن السيارات الكهربائية.

أما طاقة للألواح الضوئية فتم تأسيسها للمساهمة في توسعات في مشروعات الطاقة الشمسية، وهي حاليًا بتعمل على مشروعات زراعية، سياحية وصناعية.

إيرادات طاقة باور بتشكل 19% من إجمالي إيرادات طاقة عربية، ولكن مساهمتها في الأرباح قبل الفوائد، الضرائب والإهلاك بتوصل لـ 36%، ودة أكتر من ضعف مساهمتها في الإيرادات ودة علشان هامش أرباحها قبل الفوائد، الضرائب والإهلاك أكبر من طاقة بترول.

طاقة مياه

طاقة عربية أسست شركة “طاقة مياه” في مارس 2021، علشان تحول طاقة عربية لشركة مرافق متكاملة، بتقوم بتوفير المرافق التلاتة الرئيسية: الغاز، المياه، الكهرباء.

خدمات “طاقة مياه” بتتضمن تحلية مياه البحر “إزالة الملح من الماء”، التنقية “إزالة البكتيريا من الماء”، المعالجة الكيميائية، معالجة الصرف الصحي، وعدادات المياه.

مخاطر الصناعة
من المهم ذكر إن إفصاح شركة طاقة عربية سلط الضوء على عدد من المخاطر الموجودة في الصناعات اللي بتشتغل فيها. على سبيل المثال، التقرير اتكلم عن إن إزاي مفيش خطة واضحة من الحكومة المصرية لتحديد أسعار الكهرباء للشرائح المختلفة، ودة اللي بيأثر على قدرة الشركة على اتخاذ قرارات استثمارية في المستقبل.

صناعة الغاز والبترول كمان بتعاني من نقص في تنظيم اللوائح، دة بحسب الإفصاح. ومثال على كدة هو منح، تجديد، أو إلغاء تراخيص لتوزيع منتجاتها البترولية. أما بالنسبة للغاز، فتدخل الحكومة الكبير في الصناعة بيأثر على إعادة تسعير المنتجات في الأوقات اللازمة، ودة بيبان أكتر مع انخفاض قيمة الجنيه، وإن إعادة التسعير مش بيحصل في نفس الوقت.

مقاييس رئيسية