مارس شهر بيدور حولين الستات مع احتفالات عيد الأم واليوم العالمي للمرأة في مصر وحولين العالم، وعلشان كده قررنا نعرفهم على صاحب جديد ممكن يعتمدوا عليه والصاحب ده هو الاستثمار في الشركات.
ليه الشركات بالتحديد؟ لأن في دراسات كتير بتوضح ان الاستثمار في أسهم الشركات أحسن طريقة يعملوا بيها ثروة ويأمنوا مستقبلهم، علشان كده قررنا أن احنا نبص على الوضع الحالي ونشوف لو الستات والاستثمار في الشركات ممكن يبقوا صحاب.
لقينا إيه
أول حاجة بصينا عليها كانوا المستثمرين على ثاندر. لقينا أن المستثمرات عددهم قليل مقارنة بإجمالي عدد المستثمرين
ثانية واحدة…
هل البورصة فيها تحيز؟
يعني ايه بورصة اصلاً؟ البورصة هي مكان بتقدر من خلاله تشتري أو تبيع جزء من شركة والجزء ده بنسميه (سهم).
“البورصة مفيهاش تحيزات” جملة فيها معلومة مهمة.
البورصة مش بتفرق ما بين أي مستثمر سواء كان راجل أو ست. ببساطة البورصة عبارة عن مكان بيتم فيه تنفيذ أوامر بيع وشراء الأسهم بغض النظر مين اللي بيطلبها.
الأبحاث العالمية كمان بتبين إن المستثمرات أداءهم أحسن بمتوسط 0.4٪ من الرجالة.
طيب بما إن البورصة بطبيعتها مش بتفضل حد على التاني والستات بيستثمروا بشكل أفضل من الرجالة، يبقى ليه الفجوة دي لسه موجودة؟
هل الستات مش مهتمين بعالم البيزنس؟
قررنا نشوف لو الستات اصلاً مهتمين بعالم البيزنس، ازاي؟ من خلال اكتشاف لو ليهم دور في مجالس الإدارة والمناصب الإدارية وبصراحة الأرقام كانت إيجابية.
بحسب تقرير صادر من مرصد المرأة المصرية في مجلس الإدارة (WoB) سنة 2021، زادت نسبة الستات في مجالس إدارات الشركات المدرجة بالبورصة المصرية بنسبة 31٪ مقارنة بسنة 2020.
وبشكل عام، زادت نسبة الستات في مجالس إدارات الشركات والبنوك بتقريباً نسبة 30% سنة 2021 مقارنة بالسنة اللي قبلها.
السوق مش بس فيه تمثيل نسائي في مجالس إدارات الشركات ولكن كمان البورصة المصرية بتضم نائبة رئيس وتمثيل نسائي بنسبة 40٪ في مجلس الإدارة.
اتكلمنا مع نيفين الطاهري، أول ست مُنتخبة في مجلس إدارة البورصة المصرية ورئيس مجلس إدارة شركة دلتا شيلد للاستثمار، وهي شركة استثمارية خاصة علشان نعرف رأيها على الموضوع.
وقالت الطاهري: “تعيين سيدات في الادارة مش مجرد شيء روتيني، ولكن احنا بنفكر بشكل مختلف فوجودنا في مجالس الإدارة بيعمل فرق كبير في أداء الشركات.”
وزي ما قالت نيفين، الستات في مجالس الإدارة (وفي المناصب الإدارية العليا) ليهم بصمة مميزة. وفقًا لدراسة عملتها جامعة هارفارد، لما الشركات اتحولت من عدم وجود ستات خالص في المناصب العليا إلى انهم ماسكين 30٪ من المناصب العليا زادت الأرباح بنسبة 15٪.
ولو فيه حاجة واحدة هنتعلمها من الاحصائيات هتكون ان الستات مش بيبعدوا من المناصب القيادية. ولكن هل بيبعدوا عن البورصة بشكل خاص؟
وده خلانا ندور اكتر. ايه هي أسباب الفجوة دي؟
ايه هي الأسباب؟
الشاشة الكبيرة
أول حاجة بصينا عليها هو ازاي الاعلام بيصور البورصة، بالأخص علشان كلنا بنتأثر بالعالم اللي حوالينا واللي بنشوفوه في التليفزيون، صح؟ وبصراحة الموضوع مش لذيذ اوي.
الأفلام والمسلسلات عادةً بيخلوا البورصة تبان انها بس للرجالة الأغنية، هما بس اللي يقدروا يستثمروا. اكنها لعبة للأغنية اللي بيخاطروا بمبالغ كبيرة.
اللعب بحرص
دلوقتي لو البورصة فيها مخاطر كتير والابحاث بتوضح أن معظم الستات مش بيحبوا المخاطر العالية، فمن المنطقي إن ستات قليلة هتببقي عايزة تستثمر فيها.
“السيدات بطبيعتهم أكثر تحفظاً” نيفين وضحت.
واحد من أكبر البنوك الأمريكية لقي أن الستات بتاخد تقريباً 82٪ من المخاطر اللي بياخدها الراجل لما يستثمر. في الدراسة دي كمان، لقوا أن الستات برغم انهم بياخدوا مخاطر أقل ولكن قدروا يحققوا عوائد أعلى مقارنة بالرجالة.
وبما أن الستات يميلوا لتجنب المخاطر، فهل ده معناه انهم هيختاروا استثمارات أقل خطورة؟ الإجابة هي إحتمال، على حسب كلام ذهب مصر، 44% من عملائهم ستات بتستثمر في الذهب. وعلي حسب بياناتهم، الفئات العمرية الأكبر من الستات بيميلوا انهم يستثمروا في الذهب.
الذهب بيعتبر عادةً استثمار آمن عشان هو شيء تقدر تحتفظ بيه وقيمته بتكون عادةً مستقرة خصوصاً في أوقات الاضطراب الاقتصادي.
الطريق للمستقبل
أول خطوة لسد الفجوة دي هي من خلال إن احنا نحاول نغير الطريقة إللي الناس بتبص بيها على الاستثمار في الأسهم. على الرغم أن ناس كتير بيقولوا أن البورصة مليانة مخاطر إلا إنها من أحسن الطرق انك تعمل ثروة علي المدى البعيد. لما تستثمر على المدى البعيد، فإنت كده بتقلل من المخاطر لأن الوقت بيخليك تتغلب على تقلبات السوق.
عشان نعمل تغيير بجد محتاجين ان احنا نبدأ نعرف بناتنا على أهمية الاستثمار ونساعدهم على تطوير المهارات اللي محتاجنها علشان يبقوا مستثمرات.
الخلاصة
بغض النظر عن التحيز وايه اللي بيتقال في وسائل الإعلام، الحقيقة النهاردة هي إن ستات أكتر بكتير بدأت تستثمر في البورصة.
اعتبارًا من سنة 2021، 67٪ من الستات في أمريكا كانوا بيستثمروا خارج خطط التقاعد الخاصة بيهم، وفقًا لموقع موتلي فول. وبيانات ثاندر بتبين أن الستات عندهم رغبة أكبر انهم يتعلموا اكتر عن الفلوس والاستثمار.
احتمالية ان الستات تحضر محاضرات وندوات ثاندر ضِعف الرجالة.
كمان عدد المستثمرات على ثاندر زاد 6 أضعاف في 2023 مقارنة مع 2022.
في الآخر، زي ما قالت نيفين “المفروض التعليم المالي يكون حاجة مهمة للجميع”.
من خلال الدعم والموارد، الستات مش بس هتستفاد من فرصة تنمية ثروتهم ولكن هيمهدوا الطريق لمشهد استثماري أكثر شمولاً للأجيال الجاية.
بمناسبة انك هنا، تقدري تسجلي لحضور الندوة الاونلاين الجاية عن أساسيات الميزانية والاستثمار. استثمري في مستقبلك، وكوني قدوة ومهدي الطريق لستات اكتر في المستقبل.
